開場白
新聞紙有「擔屎唔偷食」嘅傳聞。
「天下風俗善惡存乎人，人之賢否存乎教。」—白沙先生。
點解同屎有關
廣州話「擔屎唔偷食」係話人老實可靠。點解同屎有關？
有一個講法。屎最啱做肥料，偷人哋啲屎有着數。做「倒夜香」嘅人，「擔屎唔偷食」。但係，講來講去，橫解掂解，都搵唔到聲時（唔覓聲時（make sense））。
陳獻章，明朝人，由於係廣東新會白沙村人，人稱「白沙先生」，著有《陳白沙文集》。 仕途崎嶇，16 歲就中左秀才，19 歲中舉人，接下泥的會試，三次都中唔到進士，名落孫山，番去新會白沙，潛心講學，宣揚「存天理，守本心」，係同主流學說「朱程理學」，即係「存天理，滅人欲」唔同， 唔怪之得會試肥佬啦。
後泥被人舉薦當官，到左北京，「名震京師」，「真儒復出」，不滿官場腐敗， 冇幾耐，就寫左一份《乞修養疏》，話舊疾復發，年紀大，佢老母掛住佢掛到病左，感動左皇帝，就被封為「翰林院檢討」，退休回鄉，潛心講學，開創左領南學派——白沙學派。佢過住清淡嘅日子，寧願同鄉里借貸，都唔收受朝廷嘅俸祿。
啲鄉里就以「儋石不偷食」讚佢清廉自守。其中「儋」係讀「耽 daam1 ]（例如：擔任），係裝穀物嘅架撐（容器），「石」讀 [daam3]（例如：擔子，重擔，1 「擔」米 ），係容量單位，「儋石」有「少量」嘅意思。至于「偷食」，並唔係「偷嘢食」，「偷」係「苟且」咁解，例如「偷生」、「偷活」。
但由於口說耳聽，有邊讀邊，深僻嘅「儋」變成個個都識睇嘅「擔」，本應讀 [daam3] 音嘅「石」，就讀成「石頭」嘅「石」音，仲逐漸演變成近音嘅「屎」（北方話直頭一樣音添）。於是乎，「儋石不偷食」就成爲「擔屎唔偷食」，留「香」百世。
收場白
黑格爾的名言：
「人類從歷史中學到的唯一教訓，就是人類無法從歷史中學到任何教訓。」
《機動戰士 Z 高達》第 36 集中主角阿寶的其中一句對白：
「人類總要重複同樣的錯誤。」
留香百世。