嘩啦嘩啦

嘩啦嘩啦（Walla-Walla）又叫做「電船仔」，或者「水上的士」。佢其實係用「馬達」發動嘅木船，大約 20 英尺長，冇甲板，船倉喺水平線下面，可載客 20、30 人，航速慢（約 4 - 6 海浬），1950 年代至 1960 年代最為盛行。因為冇甲板，海事處界定佢係一等船，唔好誤會，係只可喺內港（即一等航區）航行。

以前仲未有海底隧道，午夜 12 點，渡海小輪就瞓教（俗稱打烊），過海就要坐嘩啦嘩啦。

一早，住港島，搭上晝 6 點半頭班火車番內地嘅乘客，就要坐佢，因為渡海小輪仲瞓緊教。佢又送報紙過九龍（當時所有報社都喺港島）。

日頭，佢又接遠洋輪船嘅生意，為個啲駛唔到入內港嘅大船，提供人員及貨物接駁服務。

60 年代是嘩啦嘩啦嘅黃金時期，有成 200 艘喺內港水域航行。

船公司喺主要碼頭放個「電船亭」。乘客喺電船亭買飛，1960 年初期，係 5 毫子。電船亭裏面有無線電，方便調動船隻。船主集齊乘客就開船，乘客亦可自行包船。個陣畤，天星小輪頭等收費 2 毫子，二等收費 1 毫子。某年，頭等加斗零（5 仙），二等唔加，就攪出個風波，係另一個古仔。

外國人叫電船仔『嘩啦嘩啦』，因為發動機拍打水面，好嘈。

亦舒話，嘩啦嘩啦係「破浪而去的聲音」。

在下話，嘩啦嘩啦係「你留洋回來，無論幾大風雨，我都會去大船接你」。

上一回：祇想一生跟你走。